ՎՍՀ-ում Հայաստանի Հանրապետության դեսպան Վահրամ Կաժոյանի և ՎՍՀ-ում Լաոսի Ժողովրդական Ժողովրդավարական Հանրապետության դեսպան Սենգֆետ Հունգբունգնուանգի միջև հանդիպում

19 ապրիլի, 2021

ՎՍՀ-ում Հայաստանի Հանրապետության դեսպան Վահրամ Կաժոյանի (Vahram Kazhoyan) և ՎՍՀ-ում Լաոսի Ժողովրդական Ժողովրդավարական Հանրապետության դեսպան Սենգֆետ Հունգբունգնուանգի (Sengphet HOUNGBOUNGNUANG) միջև

Ս.թ. ապրիլի 19-ին ՎՍՀ-ում ՀՀ դեսպան Վահրամ Կաժոյանը հանդիպեց ՎՍՀ-ում Լաոսի Ժողովրդական Ժողովրդավարական Հանրապետության դեսպան Սենգֆետ Հունգբունգնուանգի հետ:

Հանդիպման ժամանակ կողմերը քննարկեցին երկկողմ հարաբերությունները, երկու երկրների միջև երկուստեք հետաքրքրություն ներկայացնող ոլորտներում իրավապայմանագրային դաշտի ընդլայնումը, COVID-19 համավարակի տարածման կանխարգելման հարցերը և Հայաստանի սահմանակից երկրների հետ հարաբերությունները:

Անդրադարձ կատարելով երկկողմ հարաբերություններին՝ ՀՀ դեսպան Վահրամ Կաժոյանը նշեց, որ ԽՍՀՄ ժամանակաշրջանում Հայաստանի և Լաոսի միջև հարաբերությունները բավականին ակտիվ էին, հատկապես կրթական ոլորտում և Հայաստան էին ժամանում Լաոսից ուսանողներ՝ ԲՈՒՀ-երում ուսանելու համար: Սակայն ԽՍՀՄ փլուզումից հետո այդ կապերը թուլացան և ներկայումս Հայաստանը և Լաոսը համագործակցում են հիմնականում միջազգային կազմակերպությունների շրջանակներում:

Դեսպան Հունգբունգնուանգը նշեց, որ Հայաստանում ուսուցանած այդ բախտավոր ուսանողների թվին է պատկանում նաև իր կինը, ով Հայաստանում սովորել է վիճագրության մասնագիտությունը և մինչև օրս երախտապարտորեն հիշում է Երևանում անցկացրած տարիները:

Երկու երկրների միջև իրավապայմանագրային դաշտը քննարկելիս կողմերի միջև պայմանավորվածություն ձեռք բերվեց, որպես առաջին քայլ, երկուստեք ներկայացնել ոլորտների ցանկը և ուսումնասիրությունից հետո պատրաստել հետաքրքրություն ներկայացնող ոլորտների համաձայնագրերի կամ փոխըմբռնման հուշագրերի նախագծեր՝ Լաոսում /նստավայրը՝ ք. Հանոյ/ ՀՀ դեսպան Վահրամ Կաժոյանի հետագայում կայանալիք այցի ընթացքում ստորագրելու համար:

Հանդիպման ժամանակ զրուցակիցները քննարկեցին նաև COVID-19 համավարակի տարածման և կանխարգելման խնդիրները: COVID-19 համավարակի տարածման և կանխարգելման խնդրին անդրադարնալիս դեսպան Սենգֆետ Հունգբունգնուանգը նշեց, որ Լաոսում գրանցվող դեպքերի մեծամասնությունը պայմանավորված է Թաիլանդում աշխատող Լաոսի քաղաքացիների սահմանի անօրինական անցման հետ:

Դեսպան Կաժոյանը ներկայացրեց նաև ՀՀ հարաբերությունները Հայաստանին սահմանակից երկրների հետ: Այս համատեքստում ՀՀ դեսպանը նշեց, որ չորս սահմանակից երկրներից երկու երկիր՝ Թուրքիան և Ադրբեջանը փակել են իրենց սահմանները և Հայաստանն ապրանքները ներմուծում է Իրանի և Վրաստանի տարածքներով և որ այս իրավիճակն արդեն շարունակվում է գրեթե30 տարի:

ՀՀ դեսպանը ներկայացրեց նաև 2020 թ. Լեռնային Ղարաբաղում տեղի ունեցած պատերազմից հետո չկարգավորված հումանիտար հարցերը՝ մասնավորապես ռազմագերիների վերադարձը: Այս համատեքստում դեսպան Կաժոյանն ընդգծեց, որ Հայաստանն անվերապահորեն կատարում է 2020 թ. նոյեմբերի 9-ին ստորագրված եռակողմ հայտարարության կետերը, այդ թվում և ռազմագերիների վերադարձի հետ կապված կետը: Սակայն Ադրբեջանը ոչ միայն բարեխղճորեն չի կատարում իր ստանձնած պարտավորությունները, այլև հրաժարվում է վերադարձնել ՀՀ ռազմագերիներին:

Դեսպան Կաժոյանը նշեց, որ ներկայումս Ադրբեջանի տարածքում պահվում են գրեթե 200 հայ ռազմագերիներ, ովքեր պահվում են անմարդկային պայմաններում՝ խախտելով նրանց մարդու իրավունքները և արժանապատվությունy

ՀՀ դեսպանը նաև անդրադարձավ 1915 թ. Հայոց Ցեղասպանությանը և դրա հետևանքով հայերի սփռմանն աշխարհում և կրճատ ներկայացրեց աշխարհի տարբեր երկրներում բնակվող հայերի թվային տվյալները: Պարոն Կաժոյանը նշեց, որ 1895-1923 թթ. ընկած ժամանակահատվածում Օսմանյան Կայսրությունում ցեղասպանության են ենթարկվել շուրջ 2 միլիոն հայեր:

Հանդիպմանը ներկա էր նաև Վիետնամում ՀՀ դեսպանության երկրորդ քարտուղար Արամազդ Մուրադյանը և Լաոսի դեսպանության դիվանագետները:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր