Հանոյում կազմակերպվեց հայկական կոնյակի և գինու համտեսի երեկո

15 ապրիլի, 2026

Վիետնամում ՀՀ դեսպանության նախաձեռնությամբ Հանոյի «Արմո-Հաուս» հայկական ռեստորանում տեղի ունեցավ հայկական կոնյակի և գինու առաջին պաշտոնական համտեսը: Միջոցառումն իրականացվեց հայաստանյան առաջատար արտադրողների՝ «Արարատ Բրենդի» և «ՄԱՊ» գործարանների աջակցությամբ:

Միջոցառմանը մասնակցում էին Վիետնամի պետական մարմինների և Հանոյում հավատարմագրված դիվանագիտական կորպուսի ներկայացուցիչներ, ինչպես նաև մշակութային և գործարար շրջանակների տասնյակ հյուրեր:

Բացման խոսքով հանդես եկավ Վիետնամում ՀՀ արտակարգ և լիազոր դեսպան Սուրեն Բաղդասարյանը: Իր ելույթում դեսպանն առանձնահատուկ շեշտեց հայկական հարուստ ժառանգության և Վիետնամի դինամիկ զարգացող շուկայի միջև առկա սիներգիան։

ՀՀ դեսպանը նշեց, որ «Հայաստանը համարվում է աշխարհի հնագույն գինեգործական կենտրոններից մեկը՝ ավելի քան վեց հազար տարվա պատմությամբ: Այսօր մենք ներկայացնում ենք մի արտադրանք, որտեղ դարավոր ավանդույթները ներդաշնակորեն համադրվում են ժամանակակից նորարարության հետ»:

Դեսպան Բաղդասարյանը նաև տեղեկացրեց, որ այս տարի Հայաստանը հյուրընկալելու է գինու միջազգային հեղինակավոր մրցույթ և Գինու փառատոն՝ հրավիրելով վիետնամցի գործընկերներին ուսումնասիրելու առևտրային համագործակցության և հայկական խմիչքների արտահանման նոր հնարավորությունները:

Հյուրերը հնարավորություն ունեցան համտեսելու հայկական ընտիր գինիներն ու լեգենդար կոնյակը՝ վայելելով հայկական խոհանոցի նմուշները:

Միջոցառումն անցավ ջերմ և բարեկամական մթնոլորտում՝ դառնալով կարևոր քայլ հայ-վիետնամական տնտեսական և մշակութային կապերի ամրապնդման ճանապարհին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր