ՀՀ դեսպանությունը Հանոյում մասնակցեց «Աշխարհի մշակույթներ» միջազգային փառատոնին

12 հոկտեմբերի, 2025

Հոկտեմբերի 10-12-ը Հանոյի Թանգ Լոնգ կայսերական ամրոցում (Thang Long Imperial Citadel) անցկացվեց «Աշխարհի մշակույթներ» (Cultures of the World) միջազգային փառատոնը, որին մասնակցեց նաև Վիետնամում ՀՀ դեսպանությունը՝ ներկայացնելով հայկական արտադրության կոնյակներ, գինիներ, ուտեստներ, հայ հեղինակների՝ վիետնամերեն և անգլերեն թարգմանված գրքեր, ինչպես նաև Հայաստանի զբոսաշրջային գրավչությունները ներկայացնող գրքույկներ և տեսահոլովակներ։

Նշենք, որ ՎՍՀ մշակույթի, սպորտի և զբոսաշրջության նախարարության կողմից կազմակերպված հիշյալ միջոցառումը համարվում է Վիետնամում երբևէ անցկացված խոշորագույն մշակութային իրադարձություն, որը կոչված է ընդգծելու մշակութային բազմազանության առանձնահատկությունները և վերահաստատելու մշակույթի կենսական դերը՝ որպես պետություններին և ազգերին միավորող կամուրջ։

Փառատոնին մասնակցած 48 երկրի ներկայացուցիչ իրենց հատկացված ազգային մշակութային տարածքներում և առանձին տաղավարներում հնարավորություն ստացան ներկայացնելու իրենց երկրի պատմական ու մշակութային ժառանգությունը, ազգային հագուստները, ավանդական երաժշտությունը, պարերը, ֆիլմերն ու արհեստները, ինչպես նաև ցուցադրելու իրենց խոհանոցային յուրօրինակ ուտեստները։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր