Հանոյում անցկացվեց Հայաստան-Վիետնամ կրթական տեխնոլոգիաների համաժողովը

23 սեպտեմբերի, 2025

Հանոյում տեղի ունեցավ «Armenia-Vietnam Edtech Summit» խորագիրը կրող համաժողովը, որին հայկական կողմից մասնակցեցին ՀՀ դեսպան Սուրեն Բաղդասարյանը, Հո Շի Մինում ՀՀ պատվավոր հյուպատոս Գրեգորի Օհաննեսյանը, «Թումո» ստեղծարար տեխնոլոգիաների կենտրոնի Միջազգային բաժնի ղեկավար Քրիս Շահինյանը, ինչպես նաև գործընկերությունների և զարգացման գծով մենեջեր Սթիվեն Բրիջեսը։

Վիետնամական կողմից համաժողովին մասնակցեցին փոխվարչապետ Ճան Հոնգ Հան, Կրթության և ուսուցման փոխնախարար Լե Քուանը, նորարարական տեխնոլոգիաների ոլորտը ներկայացնող մի շարք մասնագետներ, ուսանողներ։

Իր ելույթում ՀՀ դեսպանը, ներկայացնելով «Թումո» կենտրոնի գործունեությունը Հայաստանում և նրա սահմաններից դուրս, նշեց, որ Վիետնամում այդ մոդելի կենտրոններ հիմնադրելը համագործակցության նոր հանգրվան է երկու երկրների համար, որը ենթադրում է փոխգործակցություն ոչ միայն կառավարությունների, այլև կրթական ու գործարար շրջանակների մակարդակում։

ՎՍՀ փոխվարչապետ Ճան Հոնգ Հան, խոսելով «Թումո» կենտրոնի հետ գործակցության կարևորության և հեռանկարների մասին, նշեց, որ այս համագործակցությունը ևս մեկ անգամ դրսևորում է Վիետնամի կառավարության պատրաստակամությունը՝ զարգացնելու մարդկային ներուժը, հատկապես՝ բարձր որակավորմամբ կադրերի պատրաստման ուղղությամբ։

Ելույթներ ունեցան նաև ՀՀ պատվավոր հյուպատոս Գրեգորի Օհաննեսյանը և ՎՍՀ կրթության և ուսուցման նախարարի տեղակալ Լե Քուանը։

Հայկական պատվիրակության ներկայացուցիչները հանգամանորեն ներկայացրեցին «Թումո» կենտրոնի գործունեության ոլորտները, նպատակները, անցած ճանապարհն ու ձեռքբերումները՝ համաժողովի ավարտին պատասխանելով ներկաների հարցերին։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր