ՀՀ դեսպան Վահրամ Կաժոյանի աշխատանքային այցը Վին Ֆուք նահանգ:

08 օգոստոսի, 2023

Ս․թ․ օգոստոսի 8-ին ՎՍՀ-ում ՀՀ դեսպան Վահրամ Կաժոյանն աշխատանքային այցով գտնվում էր Վիետնամի Վին Ֆուք նահանգում։

Այցի շրջանակներում դեսպան Կաժոյանը հանդիպեց Վին Ֆուք նահանգի ժողովրդական կոմիտեի նախագահի տեղակալ Վու Չի Զանգի հետ։

Հանդիպման ընթացքում կողմերը քննարկեցին Հայաստանի և Վիետնամի միջև երկուստեք հետաքրքրություն ներկայացնող ոլորտներում, Հայաստանի մարզերի և Վիետնամի նահանգների՝ մասնավորապես Վին Ֆուք նահանգի միջև առևտրա-տնտեսական, արդյունաբերական, զբոսաշրջային և մշակութային ոլորտներում համագործակցության զարգացման ու խորացման հնարավորությունները, մտքեր փոխանակեցին տարածաշրջաններում ներկայիս իրավիճակի վերաբերյալ և այլ թեմաներ։

Դեսպան Կաժոյանը ներկայացրեց Ադրբեջանի կողմից Լաչինի միջանցքի ապօրինի շրջափակման հետևանքով Լեռնային Ղարաբաղում ստեղծված հումանիտար իրավիճակը։

Վին Ֆուք նահանգի ժողովրդական կոմիտեի նախագահի տեղակալ պարոն Վու Չի Զանգը ներկայացրեց նահանգի առավել զարգացած ոլորտները՝ հավելելով, որ նահանգի ուշադրության կենտրոնում է էկոհամակարգի վերականգնման և զբոսաշրջության ոլորտների զարգացումը, որի շնորհիվ նահանգը գրավում է օտարերկրյա ներդրողների ուշադրությունը: Պարոն Վուն հանձնարարեց նահանգի արտաքին գործերի, մշակույթի, սպորտի և զբոսաշրջության դեպարտամենտներին և այլ գործակալություններին սերտորեն համագործակցել Հայաստանի դեսպանության հետ և վերահաստատեց, որ Վին Ֆուք նահանգում կան բոլոր բարենպաստ պայմանները օտարերկրյա, ներառյալ, հայկական ձեռնարկությունների համար նահանգում ներդրումներ կատարելու համար:

Հաշվի առնելով նահանգի ռազմավարական դիրքը՝ մայրաքաղաք Հանոյի և Նոյ Բայ միջազգային օդանավակայանի հարևանությամբ, Վին Ֆուքն ունի կարևորագույն լոգիստիկ նշանակություն՝ ամբողջ տարածաշրջանում բեռնափոխադրումների իրականացման առումով:

Վին Ֆուք կատարած աշխատանքային այցի շրջանակներում տեղի ունեցած հանդիպմանը դեսպան Կաժոյանին ուղեկցում էր ՀՀ դեսպանի օգնական տիկին Նգույեն Թան Տամը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր