ՎՍՀ-ում ՀՀ դեսպան Վահրամ Կաժոյանի հանդիպումը Վերադարձնենք երեխաներին ամերիկյան հասարակական կազմակերպության նախագահ, ամերիկահայ Ռոբերտ Կալաթչանի հետ:

13 հունվարի, 2023

Ս.թ. հունվարի 13-ին ՎՍՀ-ում ՀՀ դեսպան Վահրամ Կաժոյանը (Vahram Kazhoyan) հանդիպեց Վերադարձնենք երեխաներին (Giving it Back to Kids) ամերիկյան հասարակական կազմակերպության հիմնադիր և նախագահ ամերիկահայ Ռոբերտ Կալաթչանի (Robert Kalatschan) հետ:

Դեսպան Կաժոյանը հանդիպման ընթացքում հակիրճ պատմական ակնարկ կատարեց հայ-վիետնամական հարաբերություններին, ինչպես նաև ներկայացրեց Վիետնամում ՀՀ դեսպանության գործունեության հիմնական ուղղությունները:

Իր հերթին պարոն Կալաթչանը նշեց, որ «Վերադարձնենք երեխաներին» ՀԿ-ն Վիետնամում գործունեություն է ծավալում արդեն 20 տարուց ավել և ամենահին միջազգային հասարակական կազմակերպությունն է երկրում: Այնուհետև պարոն Կալաթչանը հակիրճ ներկայացրեց իր կազմակերպության հիմնական գործունեության ոլորտները, որոնք իրականացվում են Վիետնամում, Կամբոջայիում, Լաոսում և Ֆիլիպիններում:

Դեսպան Կաժոյանը ներկայացրեց նաև Լաչինի միջանցքի արդեն մեկ ամիս շարունակվող շրջափակման արդյունքում՝ Արցախում առաջացած հումանիտար իրավիճակը, որի զոհերն են դառնում նաև Արցախի երեխաները, հավելելով, որ միջազգային հանրության ու միջազգային կազմակերպությունների կոչերն ազդեցություն չեն ունենում Ադրբեջանի իշխանությունների վրա: Արցախում արդեն զգալի է պարենի ու դեղորայքի պակասը:

Հանդիպման ընթացքում կողմերը պայմանավորվածություն ձեռք բերեցին կազմակերպել նոր հանդիպում՝ ՀՀ դեսպանության և Վերադարձնենք երեխաներին (Giving it Back to Kids) ամերիկյան հասարակական կազմակերպության միջև հետագա հնարավոր համագործակցությունն ավելի առարկայական քննարկելու նպատակով:

Լինելով ամերիկահայ, պարոն Կալաթչանը շատ ոգևորված էր ՀՀ դեսպանություն այցելելությամբ. նրա հայրը 1915 թվականին Արևմտյան Հայաստանից տեղափոխվել է Խորհրդային Հայաստան, այնուհետև Ուկրաինա, որտեղից էլ արտագաղթել է Միացյալ Նահանգներ: Ներկայումս բնակվում է Կալիֆորնիայում: Նա ներգրավված է եղել Փասադենայում Հայոց Եղեռնի հուշարձանի կառուցման աշխատանքներում:

Վերադարձնենք երեխաներին ամերիկյան հասարակական կազմակերպության նախագահ Ռոբերտ Կալաթչանի հետ հանդիպմանը մասնակցում էին ՀՀ դեսպանության երկրորդ քարտուղար Արամազդ Մուրադյանը և հասարակական կազմակերպության փոխնախագահ տիկին Տոնգ Թհի Թհան Տամը (Ms. Tong Thi Thanh Tam):

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր